Turmush — Баткен шаарынын тургуну Эшимбек Абдраимов өзү казган кудуктан 16 күндөн кийин куткарылган. Уулу Азатбек Абдримов Turmush басылмасына берген комментарийинде атасынын абалы жакшы экенин билдирди.
Ал атасы учурда шок абалда болгондуктан анын тынчын албоону суранды. Анын айтымында, окуя болгондон кийин Бишкектен Баткенге келишкен.
«Окуя Нооруз күнү болгон экен. Биз жаштыгыбызда эле атам менен апам ажырашып кеткен. Биз Бишкекте жашайбыз. Бирок байланышып, сүйлөшүп турабыз. 21-март күнү түшүп кетип, 6-апрель чыккан. Ага чейин бир туугандары да келип кабар алып турган. Атам өзү жалгыздыкка көнгөн адам, ызы-чууга чыдабайт. Ошентип кокустуктан түшүп кеткен экен. Анан кийин бир туугандар да келип, кыйкырып-кыйкырып кетишкен. Өзү тоого да кетип жүрүп келчү. Телефон чалсак да албай жаткан. Кийин атамдын эң кичинекей иниси көптөн бери жок болду деп издеп жүргөн. Байкем өзү көрүп калган. Ошо менен туугандарды, ӨКМди чакырган. Алар убагында келген. Жалпысынан 16 күн жаткан.
Окуя болгондон кийинки күнү эле келгенбиз. Абалы жакшы, дарыгерлер дагы колдон келишинче карап жатышат. Денеси баары таза. Ушул кудукту да 65 жашта өзү казды. Суу чыккан кезде көрүп кеткен элем. Өзү тактайдан тепкич жасап кирип чыккан. Ал жерге кирип чыгып жүргөнү үчүн ага баары тааныш болгон, шок абалга алдырган эмес. Ал кыйкырганда угулган эмес, анткени тереңдиги 20-21 метр болгон. Астындагы 4 метрдей тактайдан тепкич сууга чирип калганбы, сынып калыптыр. Ал өзүнө суудан чыгып отура турган жай казып, суу ичип жашап турган. Дагы деле шок абалда, баш мээси чайкалган. Эки күндөн бери буту менен басып чыгып, тамак ичип жатат. Абалы жакшырганда сиздерге кенен айтып берет», - деди Азатбек Абдраимов.
Буга чейин Turmush 2026-жылдын 6-апрель күнү Баткен шаарында өзүнүн үйүндөгү кудукка түшүп кеткен адам куткарылганын жазган.
Куткаруучуларга саат 16:44тө Баткен шаарынын 8-март көчөсүндөгү үйлөрдүн биринде 65 жаштагы тургун өз короосундагы суу кудугуна түшүп кеткендиги тууралуу маалымат түшкөн. Ал жерге Өзгөчө кырдаалдар министрлигинин кызматкерлери чакырылган. Куткаруучулардын ыкчам аракетинин натыйжасында ал 18 метр тереңдиктеги кудуктан чыгарылып, тез жардам кызматкерлерине өткөрүлүп берилди.
65 жаштагы жарандын куткаруучуларга айтуусуна караганда, ал 22-март күнү өзү казган 18 метрлик суу кудугуна суунун тартылбай калганынан колдо жасаган шаты менен түшкөн. Бирок шаты сынып кеткендиктен ал кудукта калып калган. Шатынын сыныктары менен өзүнө жай казып, суудан өйдө отурган. Телефону сууга түшүп кеткендиктен кыйкырып, бирок тереңдиктен үн сыртка чыккан эмес.
Ал эми 6-апрелде, тактап айтканда 16 суткадан кийин кошуна балдардын жардамында анын кудукта экени байкалып, куткаруучулар чакырылган.
Учурда жабырлануучу медицина кызматкерлеринин көзөмөлүндө. Анын абалы туруктуу деп бааланып жатат.